Hospital binası stasionar və diaqnostik hissələrdən ibarətdir. Stasionar hissəsi yeddimərtəbəli, diaqnostik hissəsi isə dördmərtəbəli olan hospital 206 çarpayılıqdır və 37 500 m² ümumi ərazini əhatə edir.

Pediatriya və Neonatologiya şöbəsində ümumi pediatriya, genetik konsultasiya, pediatrik nevrologiya, kardiologiya və cərrahiyyə xidmətləri göstəriləcək, həmçinin qabaqcıl laparoskopik prosedurlar icra olunacaq. Hospitalın Şüa diaqnostikası və Radiologiya şöbəsi rentgen, MRT, kompüter tomoqrafiyası (KT) və ultrasəs müayinəsi (USM) avadanlıqları ilə təchiz olunaraq, çoxmetodlu diaqnostik və müdaxiləli vizualizasiya xidmətləri təklif edir. Bundan əlavə, hospitalın ümumi tutumu 145 yerlik olan müasir konfrans zalında cərrahi əməliyyatları birbaşa izləmək mümkündür.

Layihədə tətbiq olunan mühəndislik və təhlükəsizlik sistemləri: Müəssisədə Bina İdarəetmə Sistemi (BMS), Keçidə Nəzarət Sistemi, Avtomatik Yanğınsöndürmə və Yanğın Siqnalizasiyası sistemləri quraşdırılmış, həmçinin ərazi su hidrantları, yanğın dolabları və ilkin yanğınsöndürmə vasitələri ilə tam təchiz olunmuşdur.